இரண்டு வகை சிம் பயன்பாடு

பொதுவாக மொபைல் போன்களில் ஜி.எஸ்.எம். அல்லது சி.டி.எம்.ஏ வகை தொழில் நுட்பத்தில் இயங்கும் போன்கள் எனத் தனித்தனியே வடிவமைக்கப்பட்டு கிடைத்து வருகின்றன. 

இரண்டு சிம்களில் இயக்கப் படக் கூடிய மொபைல் போன்கள் வடிவமைக்கப்பட்ட போது, ஜி.எஸ்.எம். மற்றும் சி.டி.எம்.ஏ வகை சிம்கள் தனித்தனியே பயன்படுத்தும் வகையில் கிடைத்தன. ஒன்றின் இடத்தில் இன்னொன்றைப் பயன்படுத்த முடியாது. 

இந்தியாவில் முதன் முதலாக இரண்டு சிம் பயன்பாட்டில், எந்த தொழில் நுட்ப (ஜி.எஸ்.எம்./ சி.டி.எம்.ஏ.) சிம்மையும் எதன் இடத்திலும் பயன்படுத்தும் வகையில் போன் உருவாக்கப்பட்டு, மலிவான விலையில் விற்பனைக்கு வந்துள்ளது. 

பிரைட் டெலிகாம் நிறுவனம் இவ்வகையில் ஒரு போனை வடிவமைத்து ஜிபோன் (‘GFone’G588) என்ற பெயரில் தந்துள்ளது. இதில் இரண்டு ஜி.எஸ்.எம். அல்லது ஒரு ஜி.எஸ்.எம் + ஒரு சி.டி.எம்.ஏ. சிம்களைப் பயன்படுத்தலாம். 

இது ஒரு முழு குவெர்ட்டி கீ போர்டு கொண்டது. 2.2 அங்குல வண்ணத்திரை கொண்டது. புளுடூத், எப்.எம். ரேடியோ, வாப்/ஜி.பி.ஆர்.எஸ்., எம்பி3 மற்றும் எம்பி4 பிளேயர், வீடியோ ரெகார்டிங் மற்றும் பிளேபேக், 8ஜிபி வரை அதிகப்படுத்தக் கூடிய மெமரி, 1.3 எம்பி கேமரா ஆகியன கொண்டதாக உள்ளது. 

இதில் இன்னொரு விசேஷம் என்னவென்றால், இதில் இந்திய காலண்டர் தரப்பட்டு, இந்திய பண்டிகைகள் மற்றும் விசேஷங்கள் குறிக்கப்பட்டுள்ளன. இதன் குறியீட்டு விலை ரூ.4,799.